३० जुलाई —गैरआवासीय नेपाली संघ (एनआरएनए) का एकता महाधिवेशनबाट निर्वाचित अध्यक्ष महेश कुमार श्रेष्ठले संघलाई संस्थागत स्थायित्व, कानुनी वैधता र वृहत एकताको मार्गमा अगाडि बढाउने स्पष्ट अठोट व्यक्त गरेका छन्।
श्रेष्ठले देश र विदेशमा रहेका सम्पूर्ण एनआरएन अभियन्ता तथा एनसीसी प्रतिनिधिहरूलाई एकताको सन्देश दिँदै कानुनी प्रक्रिया अनुसार सम्पन्न भएका राष्ट्रिय समन्वय परिषद् (एनसीसी) हरूलाई मान्यता दिने प्रतिबद्धता जनाएका छन्।
“संघमा केही साथीहरूको व्यक्तिगत धारणा मात्र होइन, देशको कानुन, संस्था सञ्चालनको विधान र सर्वोच्च अदालतको परमादेशलाई पनि हामीले सम्मान गर्नुपर्छ,” श्रेष्ठले मंगलबार सञ्चारकर्मीहरूसँग भने।
उनले एनआरएनएको उच्चस्तरीय समितिबाट गत मे महिनामा सम्पन्न एकता महाधिवेशनमार्फत नयाँ आइसीसी कार्यसमिति वैधानिक रूपमा निर्वाचित भइसकेको उल्लेख गर्दै, अब अक्टोबरमा गरिन खोजिएको अर्को निर्वाचनको आवश्यकता नरहेको स्पष्ट पारे।
४० भन्दा बढी देशमा सम्पन्न एनसीसी निर्वाचन
श्रेष्ठका अनुसार अहिलेसम्म ४० भन्दा बढी देशमा एनसीसी निर्वाचन सम्पन्न भइसकेको छ, र तीमध्ये अधिकांश एकता महाधिवेशनबाट निर्वाचित आइसीसी नेतृत्वसँग सहकार्यमा रहेका छन्।
“हामी नजिकबाट सबै निर्वाचनहरू नियालिरहेका छौं। जुनसुकै एनसीसीले एकताको भावना बोकेर हाम्रो कार्यसमितिसँग सहकार्य गर्छ, ती सबैलाई स्वागत गरिनेछ,” श्रेष्ठले सकारात्मक सन्देश दिए।
विभाजन होइन, सहकार्यमा बल
श्रेष्ठले संघभित्रको एकतालाई कमजोर पार्ने कार्यप्रति सचेत रहन सबै पक्षलाई आग्रह गर्दै बद्री केसी समूहद्वारा गरिएको एकल निर्णय र निर्वाचनले संस्थाको मर्यादालाई कमजोर पार्ने बताए।
“हामी चाहन्छौं सबै प्रवासी नेपालीहरू एउटै संस्थामा गोलबद्ध होऊन्। फुट होइन, सहकार्य र संवाद नै हाम्रो मुलमन्त्र हो,” श्रेष्ठले बताए।
विवरण चाँडै सार्वजनिक गरिने
श्रेष्ठले सबै एनसीसी निर्वाचनको विस्तृत विवरण तथा सहकार्यको अवस्था केही दिनमै सार्वजनिक गरिने जानकारी दिँदै, आगामी दिनमा संघलाई अझ मजबुत, समावेशी र पारदर्शी बनाउने दिशा तय भइसकेको उल्लेख गरे।
निष्कर्षमा, महेश कुमार श्रेष्ठको नेतृत्वले एनआरएनएलाई कानुनी, संस्थागत र भावनात्मक रूपमा एकतावद्ध गर्दै विश्वभर रहेका नेपालीहरूबीच नयाँ आशा, भरोसा र स्थायित्वको आधार तयार गर्दैछ।
Leave a Reply