काठमाडौं/टोकियो —नेपाल राष्ट्र बैंकको १८औं गभर्नरको रूपमा अर्थशास्त्रका प्राध्यापक डा. विश्व पौडेलको नियुक्तिलाई लिएर गैर आवासीय नेपाली संघ (NRNA) अन्तर्राष्ट्रिय समन्वय परिषद्का अध्यक्ष महेश कुमार श्रेष्ठले गहिरो आशा, विश्वास र जिम्मेवार शुभकामना प्रकट गरेका छन्।
एक खम्बा नेतृत्वकर्ता, सहकार्यको सन्देशवाहक र समृद्ध नेपालप्रतिको अटुट प्रतिवद्धताले भरिएको श्रेष्ठको सन्देशमा उल्लेख गरिएको छ:“शिथिल बनेको अर्थतन्त्र तपाईंको कार्यकालमा माथि उठ्ने अपेक्षा गर्दै, गैर आवासीय नेपाली संघ सहकार्यका लागि सदैव तयार रहने प्रतिवद्धता व्यक्त गर्दछु।”
शिथिल अर्थतन्त्रको घडीमा गभर्नरको नियुक्ति : NRN समुदायबाट गहिरो सरोकार
नेपालको अर्थतन्त्र अहिले विदेशी मुद्रा सञ्चिति घट्दो, लगानी वातावरण अविश्वस्त, र रोजगारीको अवसर संकुचित हुँदै गएको जटिल मोडमा पुगेको बेला डा. पौडेलजस्तो अनुभवी अर्थशास्त्री राष्ट्र बैंकको नेतृत्वमा आउनु अत्यन्तै समयसापेक्ष कदम हो।
यही मोडमा, ग्लोबल नेपाली डायस्पोराको प्रतिनिधित्व गर्ने NRNAले आफ्ना तर्फबाट पूर्ण समर्थन र सहकार्यको प्रस्ताव अघि सारेको छ, जसले प्रवासी नेपालीहरूको विदेशी लगानी, रेमिटेन्स, उद्यमशिलता र आर्थिक परामर्श मार्फत राष्ट्रको पुनःउत्थानमा योगदान पुर्याउने स्पष्ट संकेत गरेको छ।
गभर्नर र NRNA: आर्थिक समृद्धिको नयाँ साझेदारी?
डा. पौडेलले विगतमा अर्थ सल्लाहकार, नीति विश्लेषक र अन्तर्राष्ट्रिय वित्तीय संस्थासँग सहकार्यकर्ताको रूपमा देखाएको कार्यकुशलता अब राष्ट्र बैंकको गभर्नरको भूमिकामा परिणत हुँदैछ। यस्तैमा, महेश कुमार श्रेष्ठज्यूको यो सन्देश NRNA र नेपाल सरकारबीच गम्भीर आर्थिक सहकार्य सुरु हुन सक्ने संकेत पनि हो।NRNA अध्यक्ष श्रेष्ठद्वारा प्रकट गरिएको “सहकार्यको प्रतिवद्धता” सधैँजस्तो सामान्य औपचारिकतामा सीमित छैन।
उनी आफैं वित्तीय क्षेत्रका जानकार, उद्यमशीलता प्रवर्द्धक र समावेशी नेतृत्वकर्ता हुन्। यस्तोमा, गभर्नर डा. पौडेल र अध्यक्ष श्रेष्ठको सहकार्यले वास्तविक नीति कार्यान्वयन, वैदेशिक लगानी आकर्षण र विश्वभर छरिएर रहेका नेपालीहरूलाई अर्थतन्त्रमा जोड्ने नयाँ ढोका खोल्ने सम्भावना प्रबल देखिन्छ।
अन्त्यमा : “अब कुरा होइन, क्रियाशील सहकार्यको समय हो”
नेपाली अर्थतन्त्रलाई गम्भीर उपचार चाहिएको छ, केवल नारा र भाषण होइन – नीति, प्राविधिक सुझाव, लगानी र विश्वासको पुनर्निर्माण चाहिएको छ। यस्तो अवस्थामा, NRNA जस्ता अन्तर्राष्ट्रिय संस्था र राष्ट्र बैंकबीचको समन्वयले आशालाग्दो परिणाम ल्याउनेछ।
महेश कुमार श्रेष्ठले उठाएको यो आवाज एक शुभकामना मात्र होइन, यो प्रवासी नेपालीको अर्थनीतिप्रतिको गहिरो चासो र सहभागिताको घोषणापत्र हो।
Leave a Reply