काठमाडौं
, २८ माघ । क्यानाडाको ब्रिटिश कोलम्बियास्थित टुम्बलर रिज सेकेन्डरी स्कूल र नजिकैको एक घरमा भएको गोलीकाण्डमा कम्तीमा १० जनाको मृत्यु भएको छ ।
अधिकारीहरूका अनुसार विद्यालयभित्रै ६ जनाको मृत्यु भएको थियो भने एक जनाको अस्पताल लैजाँदै गर्दा ज्यान गएको हो । थप दुई जनाको शव नजिकैको एक घरबाट फेला परेको छ । आक्रमणकारीले आफूलाई नै गोली हानी आत्महत्या गरेको आशंका गरिएको प्रहरीले जनाएको छ ।
घटनामा दुई जना गम्भीर घाइते भएका छन् । उनीहरूलाई हेलिकप्टरमार्फत अस्पताल लगिएको छ । अन्य करिब २५ जना घाइतेहरूको स्थानीय मेडिकल सेन्टरमा उपचार भइरहेको छ ।
प्रहरीले आक्रमणको उद्देश्य र आक्रमणकारीको पहिचानबारे अझै आधिकारिक जानकारी सार्वजनिक गरेको छैन । क्यानेडियन सञ्चारमाध्यमका अनुसार आक्रमणकारी महिला हुन सक्ने प्रारम्भिक अनुमान गरिएको छ ।
ब्रिटिश कोलम्बियाका प्रिमियर डेभिड इबीले घटनालाई “अकल्पनीय त्रासदी” भन्दै गहिरो दुःख व्यक्त गरेका छन् । यसैबीच क्यानाडाका प्रधानमन्त्री मार्क कार्नीले घटनापछि आफ्नो म्युनिख भ्रमण स्थगित गरेका छन् ।
घटनाबारे विस्तृत अनुसन्धान जारी रहेको प्रहरीले जनाएको छ ।
Leave a Reply