काठमाडौं – असार १५, राष्ट्रिय धान दिवसको अवसरमा अभिनेत्री तथा प्राइम टेलिभिजन एचडीकी निर्देशक एलिजा गौतमले परम्परागत शैलीमा धान रोप्दै माटो र कृषिप्रति सम्मान प्रकट गरेकी छन्।
सामाजिक सञ्जालमार्फत रोपाइँका रमाइला तस्बिरहरू सार्वजनिक गर्दै गौतमले लेखेकी छिन्,
“जहाँ माटोको माया हुन्छ, त्यहीँ असार १५ को खुसियाली फुल्छ!”
उक्त तस्बिरमा उनी खेतमा माटोमा हात हाल्दै, नेपाली भेषमा रमाउँदै, धान रोपाइँको सांस्कृतिक र कृषि महत्व झल्काउने दृश्यहरूमा देखिन्छिन्।
एलिजा गौतमले नेपाली चलचित्र उद्योगमा अभिनयमार्फत छुट्टै पहिचान बनाइसकेकी छन् भने सञ्चार क्षेत्रको नेतृत्व गर्दै सामाजिक चेतनामूलक कार्यक्रमहरूमा पनि सक्रिय भूमिका निभाउँदै आएकी छिन्। कृषिप्रति प्रेम र मुलुकको मौलिक चाडपर्वको संरक्षणमा संलग्न देखिनुले उनका प्रशंसकहरूलाई थप प्रेरणा मिलेको देखिएको छ।
असार १५ लाई नेपालमा ‘राष्ट्रिय धान दिवस’ तथा ‘रोपाइँ महोत्सव’ को रूपमा मनाइन्छ। यस दिन किसानहरू वर्षात्को समयसँग मेल खाँदै रोपाइँको सुरुवात गर्छन् भने शहरका बासिन्दा पनि गाउँ जाँदै माटो र संस्कृतिसँग जोडिन खोज्छन्।
एलिजा गौतमको यो सक्रियता एक उदाहरण हो – कसरी कला, सञ्चार र संस्कृति मिलेर समाजमा सकारात्मक संदेश प्रवाह गर्न सक्छ।
