बाह्रबिसे, सिन्धुपाल्चोक – २०८२ बैशाख २७ गते –सिन्धुपाल्चोकको बाह्रबिसे नगर आज एक अविस्मरणीय क्षणको साक्षी बन्यो, जब सिन्धुपाल्चोक बिजनेस क्लब र हरिमाया बाह्रबिसे फाउन्डेसनको संयुक्त पहलमा आयोजित “वृद्ध–वृद्धा सम्मान कार्यक्रम” भव्यता, गरिमा र भावनात्मक ऊर्जाले भरिएको ऐतिहासिक समारोहका रूपमा सम्पन्न भयो।
सुनौलो पुस्तालाई नमन, जेष्ठ नागरिकप्रति सम्मान
कार्यक्रममा नगर भित्रका जेष्ठ नागरिकहरूलाई दोसल्ला, नगद, लौरो, खाना तथा सम्मानपत्र सहित विशेष सत्कार गरिएको थियो। उनीहरूको जीवनका अनुभव, त्याग र समर्पणलाई उच्च सम्मान दिँदै आयोजकहरूले समग्र नगरवासीमा सामाजिक जिम्मेवारीको गहिरो सन्देश प्रवाह गरे।
उच्चस्तरीय उपस्थिति, गहकिला मन्तव्यहरू
समारोहको अध्यक्षता क्लब अध्यक्ष नयन पण्डितले गर्नुभएको थियो भने कार्यक्रमका प्रमुख अतिथि हरिमाया बाह्रबिसे फाउन्डेसनका संस्थापक अध्यक्ष नरेश लाल श्रेष्ठले जन्मभूमिप्रति समर्पण भावका साथ समाजसेवामा निरन्तर लागिरहने प्रतिबद्धता व्यक्त गर्नुभयो।
त्यस्तै, क्लबका पूर्व अध्यक्ष तथा लक्ष्मी सनराइज बैंकका सञ्चालक दिनेेश पौड्यालले समापन मन्तव्य दिँदै समाजसेवाका यस्ता कार्यक्रमहरूलाई अझ फराकिलो रूपमा विस्तार गरिने स्पष्ट सन्देश दिनुभयो।
नेतृत्व, धर्म, र संस्कृति सबैको संगम
वडाध्यक्ष विमल पौडेल, अरनिको कलेज प्रमुख यम ब. बस्नेत, नेपाल हिमालय सिमापार व्यापार संघका पूर्व अध्यक्ष अशोक कुमार श्रेष्ठ, संघका उपाध्यक्ष सुजित बस्नेत, तथा अन्य विशिष्ट व्यक्तित्वहरू कार्यक्रमको विशेष आकर्षण बने।
कार्यक्रममा स्वस्तिश्लोक वाचन, लामाहरूको बौद्धिक आशीर्वाद, तथा सहभागी वृद्ध–वृद्धाहरूको आभारपूर्ण मन्तव्यले उपस्थित सबैलाई भावविह्वल बनायो।
सफल व्यवस्थापनको सुन्दर अनुकरणीय नमूना
कार्यक्रमको समुचित सञ्चालन क्लबका महासचिव रत्न पराजुलीले गरिरहनुभएको थियो। कार्यक्रमको व्यवस्थापनमा क्लबका कोषाध्यक्ष रामचन्द्र पराजुली, सदस्यहरू राम पराजुली, जनप्रकाश चापगाईं, राजेन्द्र रिजाल, दिनेश अधिकारी, साथै फाउन्डेसनका महासचिव शेशभक्त श्रेष्ठ, देबलाल श्रेष्ठ, नवीन श्रेष्ठ लगायतको भूमिका अतुलनीय रह्यो।
नगरवासीबाट उत्साहजनक सहभागिता
कार्यक्रममा नगरका सयौं स्थानीय बासिन्दाहरूको सहभागिता, संलग्नता र उत्साहले कार्यक्रमलाई ऐतिहासिक बनायो। धेरैजसो वृद्ध–वृद्धाको आँखाबाट झरेको भावुक अश्रुले यो कार्यक्रम कति सफल र आत्मास्पर्शी रह्यो भन्ने कुराको पुष्टि गर्यो।
हार्दिक आभार
कार्यक्रमको समापनमा आयोजक संस्थाहरू सिन्धुपाल्चोक बिजनेस क्लब र हरिमाया बाह्रबिसे फाउन्डेसनले सबै अतिथि, सहभागी, सहयोगी, स्वयंसेवक र शुभेच्छुकप्रति गहिरो कृतज्ञता व्यक्त गर्दै यस्तो सामाजिक उदाहरण देशभर पुनः दोहोरिन सकोस् भन्ने शुभकामना पनि व्यक्त गरेका छन्।
