भुवनेश्वर, भारत – २०८२ वैशाख १९ गते (मे २, २०२५)—भारतस्थित क्यालिंगा इन्स्टिच्युट अफ इन्डस्ट्रियल टेक्नोलोजी (KIIT) ले नेपाली छात्रा प्रिशा साहको असामयिक निधनप्रति गहिरो शोक व्यक्त गरेको छ।
विश्वविद्यालयले आधिकारिक विज्ञप्ति जारी गर्दै लेखेको छ:
“हामी हाम्रो प्रिय छात्रा प्रिशा साहको असामयिक निधनप्रति गहिरो शोक व्यक्त गर्दछौं। आज KIIT का सम्पूर्ण वरिष्ठ पदाधिकारीहरू भेला भई परिवार, साथीहरू र सम्पूर्ण विद्यार्थी समुदायप्रति समवेदना प्रकट गर्दै हार्दिक श्रद्धाञ्जली अर्पण गरेका छन्। उनको आत्माले शान्ति पाओस्।”
वीरगञ्जकी प्रिशा साह स्नातक तहको पहिलो वर्षमा अध्ययनरत थिइन् र विश्वविद्यालयकै होस्टेलमा बस्दै आएकी थिइन्। उहाँको शव होस्टेल कोठामै फेला परेको थियो।
केही महिनाअघि सोही विश्वविद्यालयमा अर्की नेपाली छात्रा प्रकृति लम्साल पनि होस्टेलमै मृत फेला परेकी थिइन्। यस्ता घटनाहरू पुनः दोहोरिँदा विद्यार्थी समुदायमा त्रास र आक्रोश उत्पन्न भएको छ।
अखिल भारतीय विद्यार्थी परिषद (ABVP) लगायत विभिन्न विद्यार्थी संगठनहरूले घटनाको निष्पक्ष छानबिन र दोषीमाथि कारबाहीको माग गर्दै राज्य सरकारको मौनताप्रति आपत्ति जनाएका छन्। उनीहरूले अन्तर्राष्ट्रिय विद्यार्थीहरूको सुरक्षाका लागि कडा कदम चाल्न आग्रह गरेका छन्।
KIIT प्रशासनले घटनाबारे छानबिनमा पूर्ण सहयोग गर्ने प्रतिबद्धता जनाएको छ र आगामी दिनमा विद्यार्थीहरूको मानसिक स्वास्थ्य तथा सुरक्षालाई थप मजबुत बनाउने प्रयास गर्ने बताएको छ।
यस घटनाले अन्तर्राष्ट्रिय विद्यार्थीहरूको सुरक्षा, परामर्श सेवा र विश्वविद्यालयहरूको जिम्मेवारीबारे गम्भीर बहस उत्पन्न गराएको छ।
