काठमाडौं, जेठ १० — नेपाल प्रहरीको गौरव बढाउने कार्यमा उत्कृष्ट योगदान पु¥याउन सफल प्रहरी नायव निरीक्षक कुन्जाङ छोपेल शेर्पा दर्ज्यानी चिन्हद्वारा सुशोभित भएका छन्। नेपाल प्रहरी प्रधान कार्यालय, नक्सालमा प्रहरी महानिरीक्षक (आईजीपी) दिपक थापाको अध्यक्षतामा सम्पन्न नीति निर्माण समिति (PCC) को बैठकको निर्णयअनुसार शेर्पालाई प्रहरी सहायक निरीक्षकबाट प्रहरी नायव निरीक्षकमा विशेष बढुवा प्रदान गरिएको हो।
बढुवासँगै आज आयोजित एक भव्य समारोहबीच आईजीपी थापाले कुन्जाङ छोपेल शेर्पालाई दर्ज्यानी चिन्ह लगाइदिएर औपचारिक रूपमा सम्मानित गर्नुभयो। उक्त समारोहमा बोल्दै महानिरीक्षक थापाले विश्वकै सर्वोच्च शिखर सगरमाथाको सफल आरोहण गरेर संगठनको प्रतिष्ठा वृद्धि गर्न शेर्पाले देखाएको अदम्य साहसको खुलेर प्रशंसा गर्नुभयो।
उहाँले भन्नुभयो, “यो केवल व्यक्तिगत विजय मात्र होइन, यो सम्पूर्ण प्रहरी संगठनको गौरव हो। पदोन्नतिसँगै जिम्मेवारीको दायरा बढेको छ, अब अझ हौसला, समर्पण र अनुशासनका साथ राष्ट्रसेवामा लाग्नुपर्ने समय आएको छ।”
सगरमाथाको चुचुरोमा राष्ट्रिय गौरव
प्रहरी नायव निरीक्षक कुन्जाङ छोपेल शेर्पाले २०८२ जेठ ५ गते सोमबार बिहान ०८:५६ बजे सगरमाथाको चुचुरोमा पुगेर नेपाली राष्ट्रिय झण्डासँगै नेपाल प्रहरीको झण्डा र “महिला तथा बालिकाहरू विरुद्ध हुने हिंसा अन्त्य गर्न एकजुट हौं” भन्ने संदेश समेटिएको ब्यानर फहराउनुभएको थियो।
उनको यो साहसिक कार्यले न केवल प्रहरी संगठनको प्रतिष्ठा बढाएको छ, समाजमा प्रहरीप्रतिको विश्वास र सन्देशप्रतिको गहिरो प्रभाव पनि पार्न सफल भएको छ।
विशेष बढुवा : साहसको सम्मान
सामान्य प्रशासनिक प्रक्रियाभन्दा फरक, यो विशेष बढुवा उहाँको साहस, राष्ट्रप्रेम र प्रहरी संगठनप्रतिको समर्पणको प्रतिफल हो। यस्तो प्रकारको निर्णयले संगठनभित्र हौसला, प्रतिस्पर्धा र प्रेरणा फैलाउने अपेक्षा गरिएको छ।
प्रहरी नायव निरीक्षक शेर्पाको भावना
कार्यक्रमपछि संक्षिप्त प्रतिक्रिया दिँदै प्रहरी नायव निरीक्षक शेर्पाले भने, “यो पदोन्नति मेरो व्यक्तिगत प्रयास मात्र नभई सम्पूर्ण प्रहरी परिवारको समर्थन र प्रेरणाको फल हो। मैले सगरमाथाको चुचुरोमा पुग्दा महसुस गरेको गौरवलाई शब्दमा बयान गर्न सक्दिन। अब नयाँ जिम्मेवारी थपिएको छ, म यसलाई समर्पणसाथ निभाउने प्रतिबद्धता जनाउँछु।”
सगरमाथा आरोहण : राष्ट्रको नाममा
शेर्पाले आफ्नो सगरमाथा आरोहणलाई राष्ट्र र संगठनप्रतिको श्रद्धा र सम्मानको रूपमा अर्पण गर्नुभएको छ। उनले जुन ढंगले राष्ट्रिय झण्डासँगै सामाजिक चेतनाको सन्देश बोकेको ब्यानर फहराए, त्यसले प्रहरी मात्र होइन, सम्पूर्ण राष्ट्रको गौरवलाई विश्व सामु उजागर गरेको छ।
निष्कर्ष:
प्रहरी नायव निरीक्षक कुन्जाङ छोपेल शेर्पाको सगरमाथा विजय र विशेष पदोन्नति नेपाल प्रहरी इतिहासमा एक स्मरणीय अध्याय बनेको छ। उनीजस्ता साहसी र समर्पित अधिकृतहरूकै कारण प्रहरी संगठन जनविश्वास र सम्मानका साथ अघि बढ्न सफल भएको हो। उनकाे यो कार्य सम्पूर्ण सुरक्षाकर्मीहरूकाे लागी एक प्रेरणा हो—सधैं राष्ट्र र जनताको सेवामा अग्रसर रहने मार्गदर्शन हो।
