ललितपुर, इमाडोल –देशका शैक्षिक संस्थाहरूमा अनुशासन, नेतृत्व विकास र लोकतान्त्रिक अभ्यासको उत्कृष्ट उदाहरण बनेको छ – पवन प्रकृति स्कुल, इमाडोल। गत वर्षझैं यस वर्ष पनि विद्यालयले आयोजना गरेको भव्य छात्र निर्वाचन सफलतापूर्वक सम्पन्न भएको छ, जुन शैक्षिक मात्र नभई सामाजिक चेतनाको दृष्टिले पनि एक ऐतिहासिक कार्यका रूपमा लिइएको छ।
विद्यार्थीको सक्रिय सहभागिता
विद्यालय परिसर चुनावी रौनकताले पूर्णरूपमा रंगिएको थियो। बिहानैदेखि विद्यालयमा लोकतान्त्रिक उत्सव झल्किरहेको थियो। कुल १,२०० विद्यार्थीहरूले आफ्नो मतदान अधिकार प्रयोग गरे, जुन स्कुलकै इतिहासमा सबभन्दा ठूलो सहभागी संख्या मानिएको छ।
चार हाउस र छुट्टाछुट्टै मतदान केन्द्र
विद्यार्थीहरूलाई लोकतान्त्रिक अभ्यास सिकाउन विद्यालयले ग्रीन हाउस, रेड हाउस, यलो हाउस, र ब्लु हाउस भनेर छुट्टाछुट्टै चार कोठामा मतदान केन्द्र व्यवस्था गरेको थियो। प्रत्येक केन्द्रमा मतदाता विद्यार्थीहरू शान्तिपूर्ण तर उत्साही मुद्रामा देखिन्थे। कतिपय उम्मेदवारहरूले आफूलाई जिताउने दाबी गरिरहेका थिए भने समर्थक विद्यार्थीहरूमा पनि जोश र जाँगर देखिन्थ्यो।
हर कक्षामा मोनिटर, भाइस-मोनिटर र हाउस मोनिटरको चुनाव
विद्यालयले कक्षा ४ देखि माथिल्लो कक्षासम्मका लागि मोनिटर, भाइस-मोनिटर र हाउस मोनिटर पदका लागि निर्वाचनको व्यवस्था गरेको थियो। यस प्रणालीले नेतृत्व विकास मात्र होइन, उत्तरदायित्व र पारदर्शिताको भावनासमेत विद्यार्थीहरूमा भरपूर रुपमा रोपिएको छ।
एस नेपाल न्यूजका अध्यक्ष एचबी ताम्राकारको विशेष उपस्थिति
चुनावी रौनकको प्रत्यक्ष रिपोर्टिङ गर्न स्कुलमा एस नेपाल न्यूजका अध्यक्ष तथा पत्रकार एचबी ताम्राकार स्वयं उपस्थित भए। उनले मतदान स्थलको अवलोकन गर्दै सम्पूर्ण प्रक्रिया प्रति उच्च सन्तुष्टि व्यक्त गरे। हरेक हाउसको कोठामा पुगेर उनीहरूले उम्मेदवार, मतदाता र शिक्षकहरूसँग प्रत्यक्ष कुराकानी गर्दै रिपोर्ट तयार गरे, जसले विद्यालयको पारदर्शिता र लोकतान्त्रिक अभ्यासलाई सशक्त बनाएको छ।
वडा प्रमुखको सराहना
महालक्ष्मी नगरपालिका–५ का वडा अध्यक्ष कपिल केसी समेत कार्यक्रममा सहभागी भएर विद्यार्थीहरूको जोश, विद्यालयको व्यवस्थापन र शिक्षकहरूको समर्पणलाई खुलेर प्रशंसा गरे। उनले भने, “आज यहाँ जुन नेतृत्वको बीजारोपण गरिएको छ, त्यही नेतृत्व भोलिको समृद्ध नेपाल निर्माणमा सहायक बन्नेछ।”
प्रिन्सिपल एवं शिक्षाविद् उत्तर राई र भाईस–प्रिन्सिपल भुवन घिमीरेको प्रेरणादायी मन्तव्य
विद्यालयका प्रिन्सिपल एवम् शिक्षाविद् उत्तर राईले मतदानपछि सम्पूर्ण विद्यार्थीलाई शुभकामना दिँदै भने, “यो निर्वाचन केवल पदको लागि होइन, यो जिम्मेवारी, कर्तव्य र निष्ठाको अभ्यास हो।”
उक्त अवसरमा भाइस प्रिन्सिपल भुवन घिमीरेले मिडियामार्फत जानकारी दिंदै भने, “मतगणना शान्तिपूर्णरूपमा भइरहेको छ, भोलि बिहान नतिजा सार्वजनिक हुनेछ। निष्पक्ष र पारदर्शी निर्वाचन नै हाम्रो प्राथमिकता हो।”
शिक्षक–शिक्षिकाहरूको नमूना भूमिका
मतदानस्थलको सुरक्षादेखि अनुगमन, मतपेटिका व्यवस्थापन, लाइन व्यवस्थापनसम्म सबै क्षेत्रमा शिक्षक–शिक्षिकाहरूले अनुशासन र निष्पक्षतापूर्वक उत्कृष्ट भूमिका निर्वाह गरे। विद्यार्थीहरूले समेत आफ्ना शिक्षकमाथि गर्व व्यक्त गरेका छन्।
पवन प्रकृति स्कुल : अब नेतृत्व शिक्षाको हम बन्ने दिशामा
केवल शिक्षा होइन, नैतिकता, कर्तव्य, समाजप्रतिको जिम्मेवारी र राष्ट्रप्रेम सिकाउने पवन प्रकृति स्कुल अहिले देशभरका विद्यालयहरूका लागि प्रेरणाको केन्द्र बन्दै गएको छ। स्कुलको यो लोकतान्त्रिक प्रयोगले “विद्यालय नेतृत्वको पाठशाला हो” भन्ने कुरा अझै बलियो बनाएको छ।
अन्त्यमा…
यी बाल नेताहरू भोलिका जनप्रतिनिधि हुन्। आजको मतपत्र भोलिको संसदको आँकलन हो। इमाडोलको पवन प्रकृति स्कुलले यो कार्यले एकपटक फेरि प्रमाणित गर्यो—लोकतन्त्र सिक्ने उमेर बाल्यकालमै सुरु हुन्छ।
