पोखरा, ३० वैशाख —नेपाली आयुर्वेद चिकित्सा क्षेत्रमा समर्पित पूर्णायु आयुर्वेद हस्पिटल र यसका प्रमुख प्रलाद चौहान तथा वरिष्ठ चिकित्सक डा. लक्ष्मण पौडेललाई ऐतिहासिक श्रीगण्डकी शत कुण्डीय गायत्री कोटिहोम विराट् ज्ञान महायज्ञ को पावन मञ्चबाट विशेष सम्मान प्रदान गरिएको छ।
महायज्ञको आयोजनाले आयुर्वेदिक चिकित्सा, सेवा र समर्पणमा निरन्तर अग्रसर रहेको पूर्णायु समूहको योगदानलाई उच्च मूल्यांकन गर्दै यो सम्मान अर्पण गरेको हो। सम्मान ग्रहण गर्दै प्रमुख चौहानले भने—
“यो सम्मान केवल व्यक्तिलाई होइन, हामीले बोकेको विश्वास, सेवा र समर्पणको कदर हो।”
उक्त अवसरमा उनले महायज्ञका प्रमुख स्रष्टा श्रद्धेय विजयकृष्ण महाराजलाई प्रेरणा र मार्गदर्शनका लागि हृदयदेखि नमन र धन्यवाद अर्पण गरे। साथै, उनले सधैं साथ, आत्मीयता र समर्थन प्रदान गर्दै आएका प्रिय मित्र बिक्रम कार्कीलाई पनि विशेष धन्यवाद व्यक्त गरे।
चौहानले भने—
“यो सम्मान हाम्रो पूर्णायु परिवारको साझा सम्मान हो, जसले हाम्रो सेवा यात्रालाई अझ गहिरो र जनमुखी बनाउनेछ।”
नेपालमा प्राकृतिक चिकित्सा, योग र आयुर्वेदको समिश्रणमार्फत रोग उपचार र जीवनशैली सुधारमा समर्पित पूर्णायु आयुर्वेद हस्पिटल पछिल्लो समय विशिष्ट सफलताको यात्रामा रहेको छ। महायज्ञजस्तो धार्मिक, सांस्कृतिक र आध्यात्मिक अवसरमा प्रदान गरिएको यो सम्मानले आयुर्वेद सेवा क्षेत्रमा एक प्रेरणादायी सन्देश दिएको छ।
पूर्णायु हस्पिटलको यो सम्मान केवल एक संस्थाको पहिचानमा सीमित छैन, यो नेपाली आयुर्वेद प्रणालीको अन्तरात्मा र जनसेवाप्रतिको समर्पणको सम्मान पनि हो।
