काठमाडौं, एस नेपाल न्युज –भारत र पाकिस्तानबीचको चुलिँदो तनावले झण्डै भिडन्तकै रुप लिन लागेको रहस्योद्घाटन भएको छ। नेपालको पूर्व प्रधानमन्त्री तथा वर्तमान वरिष्ठ नेताको भूमिकामा रहेका केपी शर्मा ओलीले एक कार्यक्रमको क्रममा चकित पार्ने खुलासा गरेका छन्।
ओलीले भन्नुभयो, “भारत र पाकिस्तानबीच झण्डै-झण्डै हात हालाहालको स्थिति आएको थियो। हामीले संयमित हुन आग्रह गरेपछि रोकियो।”
उहाँको यो अभिव्यक्ति एकातर्फ अन्तर्राष्ट्रिय कूटनीतिक मामिलामा नेपालको सक्रिय भूमिका रहेको संकेत दिन्छ भने अर्कातर्फ यो ओलीको कूटनीतिक दाबेदारीको शैलीलाई पनि पुनः पुष्टि गर्छ।
प्रधानमन्त्री ओलीका अनुसार त्यतिबेला भारत र पाकिस्तानबीचको द्वन्द्वले गम्भीर रूप लिन सक्थ्यो तर नेपालको सन्तुलित एवं संयमित अपीलले स्थिति नियन्त्रणमा ल्याउन सघायो। ओलीले आफ्नो हस्तक्षेपलाई “शान्तिको पक्षमा उठाइएको कदम” भनेका छन्।
प्रतिक्रिया सुरु
ओलीको यो अभिव्यक्ति सार्वजनिक भएपछि कूटनीतिक वृत्त र सामाजिक सञ्जालमा विविध प्रतिक्रिया आइरहेका छन्। कतिपयले यो अभिव्यक्तिलाई उहाँको अतिशयोक्तिपूर्ण शैलीसँग जोडिरहेका छन् भने समर्थकहरूले “ओली राष्ट्रका लागि मात्र हैन, अन्तर्राष्ट्रिय शान्तिका लागि पनि चिन्तित नेता” भन्दै प्रशंसा गरिरहेका छन्।
यथार्थ के हो?
ओलीको दाबी यथार्थमा कति आधारित हो भन्नेबारे भारतीय वा पाकिस्तानी पक्षबाट कुनै आधिकारिक प्रतिक्रिया आएको छैन। तर, दक्षिण एशियाली राजनीतिमा यस्ता संवेदनशील विषयमा नेपाली नेताले सार्वजनिक रूपमा बोलेको यो दुर्लभ उदाहरण हो।
नेपालले सधैं क्षेत्रीय शान्ति र स्थायित्वको पक्षमा रहँदै आएको सन्देश ओलीले दिन खोजेको बुझ्न सकिन्छ। यद्यपि, यस्ता दाबीसँग सँगै यथार्थ पुष्टि र सन्तुलित कूटनीतिक अभिव्यक्ति आवश्यक रहेको कूटनीतिज्ञहरूको भनाइ छ।
